चीनमा भएको आगलागीमा परी ३९ जनाको मृत्यु

११ माघ,  काठमाडौं ।  मध्य चीनको जियाङ्सी प्रान्तमा एउटा स्टोरमा आगलागी हुँदा कम्तीमा ३९ जनाको मृत्यु भएको छ । नौ जना घाइते भएका छन् ।

मुलुकको सरकारी प्रसारक सिसिटिभीका अनुसार बुधबार (जनवरी २४ मा) स्थानीय समयअनुसार दिउँसो ३ः२४ बजे शिन्यु, जियाङ्सीमा एउटा स्टोरमा जमिनको तल्लो तलामा आगो लागेको थियो । त्यसमा परी अहिलेसम्म ३९ जनाको मृत्यु भएको र नौ जना घाइते भएका छन् ।

आगो लाग्नुको कारण खुलेको छैन । आगलागी भएपछि चिनियाँ राष्ट्रपति सि जिनपिङले एक विज्ञप्ति जारी गरी मुलुकमा घातक दुर्घटनाहरूमा ‘दृढ नियन्त्रण’ को आह्वान गरे । सिसिटिभी रिपोर्टका अनुसार सिले भनेका छन्, ‘मानिसहरूको जीवन र सम्पत्तिको सुरक्षा तथा समग्र सामाजिक स्थिरता सुनिश्चित गर्नका लागि बारम्बारको दुर्घटनाहरूलाई रोकथाम गर्न आवश्यक छ ।’

राज्य समर्थित आउटलेट ग्लोबल टाइम्सले पोस्ट गरेको ‘आपत्कालीन कमान्ड’ को विज्ञप्तिमा लेखिएको छ, ‘अहिले घटनास्थलमा खोजी तथा उद्धार कार्य जारी छ र दुर्घटनाको कारणबारे पनि अनुसन्धान भइरहेको छ ।’

from Online Khabar https://ift.tt/g1Z2sXI