काठमाडौं । टर्कीकी रुमेसा गेल्गी संसारकै सबैभन्दा अग्ली महिलाको रुपमा गिनिज बुकमा नाम लेखाएकी छिन् । ७ फुट अग्ली रुमेसालाई गिनिज बुक अफ वल्र्ड रेकर्डस्ले औपचारिक रुपमा विश्वकै अग्ली महिलाको कीर्तिमानी प्रमाणपत्र प्रदान गरेको हो ।
टर्कीको काराबुक प्रान्तकी गेल्गीको सरीरको उचाइ ७ फिट ०.७ इन्च रहेको छ । रुमेसाको सरीरको उचाइ धेरै हुनुको कारण चाहिं उनमा रहेको दुर्लभ रोग हो ।
वास्तवमा Weaver Syndrome भनिने रोगका कारण उनको जिउको उचाइ तीव्र गतिमा बढेको हो ।
दुर्लभ स्वास्थ्य समस्याका कारण सिर्जित आफ्नो असामान्य शारीरिक अवस्थालाई गेल्गीले प्रेरणाको रुपमा लिएकी छिन् । उनी भन्छिन्– हरेक असुविधाहरुलाई तपाईंको लागि सुविधामा परिणत गर्न सक्नुहुन्छ त्यसैले तपाईंले आफूजस्तो हुनुहुन्छ त्यसैलाई स्विकार्नु पर्दछ । आफ्नो क्षमताका बारेमा जानकार हुनुहोस् र आफ्नो तर्फबाट अधिकतम प्रयास गर्नुहोस् ।
गेल्गीले सन् २०१४ मै विश्वकी सबैभन्दा अग्ली जीवित किशोरीको रुपमा पहिलोपटक गिनिज बुकमा नाम लेखाएकी थिइन् । त्यसयता उनले आफ्नो जस्तै विभिन्न दुर्लभ तथा जटिल स्वास्थ्य समस्या भएका मानिसहरुको हीतमा पैरवी गर्नका लागि आफ्नो प्लाटफर्म प्रयोग गर्दै आएकी छिन् ।
असामान्य शारीरिक अवस्था तथा अधिकतम उचाइका कारण उनलाई सहज रुपमा हिँडडुल गर्न गाह्रो छ । त्यसैले उनले ह्वीलचेयर प्रयोग गर्दै आएकी छिन् । यद्यपि उनी वैशाखीको सहाराले पनि हिँड्न सक्छिन् ।
स्मरण रहोस् मानव इतिहासमै हालसम्मकी सबैभन्दा अग्ली महिलाको कीर्तिमान भने चीनकी जेंग जिनलियानको नाममा छ । हुनान प्रान्तकी जिनलियानको उचाइ ८ फिट १ इन्च थियो । उनको सन् १९८२ मा मृत्यु भएको थियो ।
–द इन्डिपेन्डेन्टबाट
from Online Khabar https://ift.tt/3vg3HFT
No comments:
Post a Comment