अन्तिमपटक मनाइयो हजारौं निर्वस्त्र पुरुष भेला हुने पर्व

पसिनाले लतपतिएका हजारौं संख्याका निर्वस्त्र पुरुषहरु एउटा विशेष पर्व मनाउनका लागि मन्दिरमा पुगे । यो दृश्य जापानको हो । अनि सो पर्वको नाम हो, हाडिका मात्सुरी ।

१२ सय ५० वर्ष पुरानो यो पर्व सबैभन्दा पहिले ओकायामामा रहेको प्रसिद्ध सैदाइजी मन्दिरमा मनाइएको थियो ।

चिसो मौसमका बाबजुत पर्वमा सामेल हजारौं मानिसहरु पानीमा डुब्दै अघि बढ्छन्। यसरी जलमार्गमा हिड्नुलाई त्यहाँ पवित्र मानिन्छ ।

हरेक वर्ष फेब्रुअरी महिनामा हाडिका मात्सुरी पर्व मनाइन्छ र हालै यो वर्षको पर्व मनाइएको छ ।

जापानको दक्षिणी भागमा रहेको होन्सुटापुमा मनाइने नेकेड फेस्टिभल अर्थात् नग्न पर्वसमेत भनिने यो पर्वमा पछिल्लो समय सहभागिता घट्दै गएको छ ।

जापानमा तन्नेरीहरुको घट्दो जनसंख्याका कारण पर्वको बोझ पाका मानिसहरुको काँधमा परेको हुँदा यसको रौनक हराउँदै गएकोमा यो वर्ष अन्तिम पटक मनाइएको छ ।

होन्सु टापुमा रहेको सैदाइजी केनोनिन मन्दिरमा मनाइने यो पर्वमा सहभागी पुरुषहरुले केवल लंगौटी मात्र लगाउन पाउँछन् । पर्वको सुरुआत चाहिं महिलाहरुको नृत्यबाट हुन्छ ।

बेलुकीको समयमा मानिसहरु मन्दिरको चारैतर्फ परिक्रमा गर्दछन् । रातको समयमा पुजारीले मन्दिरको अग्लो झ्यालबाट मानिसहरुमाथि काठका लठ्ठी तथा मुठ्ठा फ्याँक्छन् ।

त्यसरी फ्याँकिएका चिज जसको हातमा पर्छन् उसका लागि यो वर्ष शुभ हुने मानिन्छ । पर्वका बेला एकजना स्थानीय व्यक्तिलाई मानव देवताको रुपमा छनोट गरिन्छ र मन्दिरमा राखिन्छ ।

मन्दिरमा आएका भक्तजनहरुले ती मानव भगवानलाई छुने गर्दछन् । पर्वका बेला मन्दिरमा हजारौं मानिसहरु जापानभरबाट आउँछन् । जापानमा युवाहरुको जनसंख्या तीव्र रुपमा घटिरहेको परिप्रेक्ष्यमा १२ सय ५० वर्ष पूरानो यो पर्वको इतिहास अन्ततः समाप्त भएको छ यही वर्षदेखि ।

सन् ७२९ मा स्थापित उक्त मन्दिरका भिक्षु दाइगो फुजिनामी भन्छन्, ‘यो ठूलो पर्व आयोजना गर्नु निकै कठिन काम हो । तपाईंले देख्न सक्नुहुन्छ कि आज के भयो । यतिधेरै मानिसहरु यहाँ छन् र यो रोमान्चक पनि छ । तर पर्दा पछाडि धेरै रीतिरिवाज तथा कामहरु हुन्छन् जसलाई गर्नैपर्छ । मैले यो कठिन वास्तविक लुकाउन चाहन्न ।’

from Online Khabar https://ift.tt/ZU3Palc