अब पालो युवाको : नेतृत्वमा जोशिला पंक्ति

नेपाली राजनीतिले रुचाएको एउटा भाष्य छ, युवा नेता । उमेरले डाँडा काटेको किन नहोस् उनीहरूको नाम अघिल्तिर जोडिने विशेषण हो यो । त्यसैले त हामीकहाँ कतिपय नेतालाई सम्बोधन गर्दा भनिन्छ, ‘युवा नेता फलानो ।’

तर, यसपालिको निर्वाचनले युवा नेताको व्याकरण सच्याइदिएको छ । नेतृत्वमा साँच्चै नै युवापंक्ति उभिएका छन् । र, स्थानीय तहको परिदृश्य केही फेरबदल गरिदिएका छन् । ‘राजनीति भनेको फोहोरी खेल हो’ भन्ने पुस्तामा बेग्लै उत्साह अनि उमंग संचार गराइदिएका छन् ।

‘परिवर्तन’ खोजिरहेका आम युवाको भावना यसपटक मतपेटिकाबाट प्रकट भएको छ । भीड जम्मा गरेर, भड्किलो प्रचारबाजी अपनाएर, मासु र मदिराको भोज खुवाएर, अनेक प्रलोभन देखाएर नेतृत्वमा पुग्ने काइते जुक्तिलाई मतदाताले बदर गरिदिएका छन् । सुस्त, भ्रष्ट र अराजक सत्ताप्रतिको वितृष्णासँगै पुरातन ढर्राको कार्यशैली सच्याउन दिएको तोडिलो सन्देश पनि हो यो ।

लौरोको झट्का

लौरो, सहाराको प्रतीक । दण्डको प्रतीक । मार्गदर्शनको प्रतीक । त्यही लौरोले यसपालि नराम्ररी झट्का दिएका छन्, कतिपय नेता-कार्यकर्तालाई । चाहे त्यो बालेन साहहरूले उठाएका लौरो होस् वा हर्क साम्पाङहरूले ।

बालेन्द्र साह

३२ वर्षीय बालेन्द्र साह मुलुककै जेठो तथा संघीय राजधानीसमेत रहेको काठमाडौं महानगरपालिकाको मेयर निर्वाचित भएका छन् ।

पेसाले इन्जिनियर र रुचिले गायक तथा र्‍यापरसमेत हुन् बालेन । मधेशी मूलका साह काठमाडौंको गैह्रीगाउँमा जन्मेका हुन् । उनी आयुर्वेदिक चिकित्सक डा. रामनारायण साह र “ुवदेवी साहका छोरा हुन् । हृवाइट हाउस इन्स्टिच्युट अफ टेक्नोलोजीबाट सिभिल इन्जिनियरिङमा स्नातक र भारतको कर्नाटक विश्वेश्वरैया राष्ट्रिय प्रौद्योगिक संस्थानबाट स्ट्रक्चरल इन्जिनियरिङमा स्नातकोत्तर उनी पेशाको क्रममा देशका ६५ जिल्ला पुगेको बताउँछन् ।

२०७२ सालको महाभूकम्पपछि उनले उद्धार र राहतको काममा सक्रिय भएर समाजसेवीको छवि पनि बनाए ।

काठमाडौं महानगरपालिकामा पुराना राजनीतिक दलको धङधङी मात्रै तोडेका छैनन् बालेनले देशभरका युवामा जागरण र काठमाडौंका मतदातामा नयाँ युवा लहर ल्याइदिएका छन् ।

काठमाडौंको नगरप्रमुखमा कांग्रेस र एमालेलाई बालेनले दोब्बर मतले पछि पारेर जित हासिल गरेका छन् ।

बालेननले ६१ हजार ७६७ मत पाए भने निकटतम प्रतिद्वन्द्वी नेपाली कांग्रेसकी सिर्जनाले ३८ हजार ३४१ र एमालेका केशव स्थापितले ३८ हजार ११७ मत पाए ।

बालेेनको चुनाव चिहृनको प्रभाव यतिसम्म पर्‍यो कि उम्मेदवारी नै नपरेको लौरोमा समेत मत आयो । यो युवाको जोश-जाँगर, भिजन र मिसनका कारण आएको हो ।

हर्क साम्पाङ

स्थानीय चुनाव २०७८ मा सबैको ध्यान तानेका र चर्चित पात्र हुन् धरानका हर्क साम्पाङ राई ।
करिब १० वर्षदेखि धरानका जनसरोकारका मुद्दा उठाएर आन्दोलन गरिरहेका थिए उनी । कहिले खानेपानीको, कहिले स्वास्थ्य संस्थानमा भएका विकृतिको, कहिले बेरोजगारी, कहिले सरकारी सेवा-सुविधाका बारेमा राईले निरन्तर आवाज उठाइरहे ।

उनी धरानका समस्यालाई पन्छाउनका लागि एक्लै भए पनि लडिरहे, आन्दोलन गरिरहे ।
यहाँसम्म आइपुग्न साम्पाङले निकै संघर्ष गरेका छन् । सधैं प्रश्न गर्ने ठाउँबाट आज उनी उत्तर दिने ठाउँमा पुगेका छन् ।

चुनावको प्रचारप्रसार गर्न उनी एक्लै कुदिरहे । उनका अघि-पछि कुनै कार्यकर्ता र युवाको लहर थिएन । उनले अटो भाडामा लिएर एक्लै बोलिरहे । धरानका समस्या र समाधानका बारेमा निरन्तर बोलिरहे ।

चुनाव चिह्न लौरो पाएका उनलाई धराने जनताले महानगरको पिता बनाइदिए । एक्लै निरन्तर, लगनशील भएर भिडिरहेका साम्पाङलाई धराने जनताले पत्याए ।

२०७६ सालको स्थानीय तह उपनिर्वाचनमा मेयरको उम्मेदवार बनेका उनले ४२२ मत पाएका थिए । तर अहिले उनी २० हजार ८२१ मत ल्याएर विजयी भएका छन् ।

दुई ठूला राजनीतिक दललाई पछि पारेर एक आम मान्छे धरानको नगरपिता बनेका छन् । तर, उनको काम हेर्न भने बाँकी नै छ ।

काँध थाम्ने युवा

काठमाडौं महानगर होस् वा धरान नगरपालिका, युवापुस्ता नेतृत्वमा पुगेका छन् । यसैगरी मुलुकका अन्य स्थानीय निकायमा पनि युवाहरूलाई जनताले पत्याएका छन् । विश्वास गरेका छन् ।

बुलिङटारका २८ वर्षीय दीपेन्द्र सुनारी मगर

पूर्वी नवलपरासीको बुलिङटार गाउँपालिकामा २८ वर्षीय मेकानिकल इन्जिनियर सुनारी मगर निर्वाचित भएका छन् ।

२०४८ सालदेखि निरन्तर स्थानीय तह जित्दै आएको नेपाली कांग्रेसका गढ तोड्दै सुनारीले अध्यक्ष जितेका हुन् । उनले कांग्रेसका शशिकिरण बस्ताकोटीलाई १५९ मतले पराजित गरेका छन् ।
दीपेन्द्रले चीनको हाउझोङ विश्वविद्यालयबाट मेकानिकल इन्जिनियरिङमा मास्टर गरेका छन् ।

डडेल्धुराका परशुरामका २८ वर्षे भरत

डडेल्धुराको परशुराम नगरपालिकमा २८ वर्षे युवा भरत वडायर जोशी निर्वाचित भएका छन् । नेपाली कांग्रेसका तर्फबाट उम्मेदवार बनेका उनले माओवादी केन्द्रका शेरसिंह माललाई पराजित गरेका थिए ।

भरतले भौतिकशास्त्रमा स्नातकोत्तर गरेका छन् । उनी नेपाली कांग्रेसका १४औं महाधिवेशनमा नगरसभापति निर्वाचित भएका थिए ।

भरतले ५ हजार ९४१ मत ल्याएका छन् भने मालले ५ हजार ८०५ मत ।

रामनगरका २२ वर्षे राजाबाबु

सर्लाहीको रामनगर गाउँपालिकामा २२ वर्षे राजाबाबु यादव निर्वाचित भए । काठमाडौंमा बसेर बीबीएस पढिरहेका उनलाई बुवा शिवपुजन राय यादवले उम्मेदवारी दिन लगाएका थिए ।

राजाबाबुले ४ हजार ८१ मत पाएका छन् भने उनले प्रतिद्वन्द्वी नेपाली कांग्रेसका हरिनन्दनप्रसाद यादवलाई १ हजार ६८९ मतले पराजित गरेका छन् । राजाबाबु माओवादी केन्द्रबाट उम्मेदवार बनेका थिए ।

कालिकामाईका २१ वर्षीय वशिष्ठ

पर्साको कालिकामाई गाउँपालिकाको अध्यक्षमा २१ वर्षे युवा वशिष्ठ कुमार निर्वाचित भएका छन् ।
जनता समाजवादी पार्टीबाट चुनाव लडेका उनले कांग्रेसका ४२ वषर्ीय अजयकुमारलाई १०८ मतले पराजित गरेका हुन् । वशिष्ठले ३ हजार ७१९ मत ल्याए भने अजयकुमारले ३ हजार ६०५ । वशिष्ठ एमबीए अध्ययनको तयारी गरिरहेकै बेला गाउँपालिकाको अध्यक्षमा निर्वाचित भएका हुन् ।

को हुन् युवा ?

ओशो भन्छन्, युवा हुनु उमेरसँग खास अर्थ राख्दैन । युवा त्यही हो, जसमा जोश हुन्छ, ऊर्जा हुन्छ, उत्साह हुन्छ, उमंग हुन्छ, सकारात्मक चेत हुन्छ, चिन्तन हुन्छ । तीव्रता हुन्छ, गतिशीलता हुन्छ ।

यही जोश, ऊर्जा, उत्साह, उमंग, सकारात्मक चेत-चिन्तन, तीव्रता र गतिशीलतालाई जनताले एकपटक अजमाउन चाहेका छन् । यो नै युवा उमेरको उपहार हो ।

युवा त्यो उमेर समूह हो जसमा राष्ट्रको भविष्य, वर्तमानका साझेदार तथा समृद्धिको अग्रसंवाहक बन्ने सामथ्र्य लुकेको हुन्छ । यसैलाई साथ दिएका हुन् जनताले ।

from Online Khabar https://ift.tt/GCFKIwX